Deuteronomy 32

1“Ioe a hunu, o longo valai ga ta.

Ioe a malala, o talinga valai, o longoa a nita na ngavagu.
2A nitagu ge rata kamumu mua, ge manga a simuru.
I boru valai na hunu i rata a varili i rike.
A nitagu ge manga a vala i boru,
i rata a maka uve ri koru kamumu.
3Ngane ga vakalongo a rane BAKOVI DAGI,
mu kavurikea a rana a Vure ne hita.
4I manga a kedo i tabuli vakaroro,
i ramai kunana a ngavana i uka ma i tatami, a narona i kamumu i malamala.

5“Pali mua i uka ma mu mavonga. Mua a bakovi a ngatavine na taminga.
mu pulo lae a nita, mu putu puru a nita-muholi.
Mua a mari ni rata a naro hale. I mavonga i uka ma ge mua e tuna.
6Pali e BAKOVI DAGI ia e tamane mua.
I vakabele mua lobo, i rata mua, mua a kabu i taku.
Pali i navai mu ratea vona a naro maea?
Mua a manga, mu uka a niluhoi kamumu.

7“Mu luhoi mule a maka maki ri bele hosi.
Mu nana e tamane mua ri gi vakasiri mua.
Mu nana e huriki a gare ne mua
ri gi tuverei polo ne mua.
8 ^aNa tahuna a Vure Meli Liu,
i veru a malala ne huriki a bakovi,
i vakasiri na kabu takutaku a tabeke ge made vona.
I ru a harena malala ne ria.
E huriki a Israel ranga, e BAKOVI DAGI i ramai a ravulune ria,
i vakasiri a harena malala ne ria.
9Pali i vulakia a kabu ne Iakop ge matakaria.

10“I matavisi e huriki a Israel ri laho viliha na tabeke i ngeki,
na hini i tahoka a vilu dagi.
E BAKOVI DAGI i matavisi ria i tuhori ria.
I matakari ria, i manga a hini i matakari mule ia.
11I matakari kamumu e huriki a Israel i uka ma ri bole a vuranga,
i manga a loha i vakabebe a maka tuna ri bebe.
Na tahuna e tuna i boru,
bara i bebe polotano, i bokea na karapana i uka ma ge vurua.
12E BAKOVI DAGI kunana i vakasiri a dala ne huriki a tara vona.
I uka tara vure na tanga tara ge tuhori ria.

13“I tono ria ri matakari a tabeke na lolo,
a maka maki ni kani ri koru kamumu.
Ri bole a ame na kedo ri kani.
A maka kai a oliv ri koru kamumu na kedokedo.
14Ri bole na bulmakau, na meme a namona ruru ne ria ri ninu.
A maka bulmakau a sipsip ne ria ri gavutuvutu,
a maka sipsip gavutuvutu o Basan.
A vit ne ria i kamumu hateka.
A kanena vain ne ria ri koru kamumu.

15“E huriki a Iesurun
ri kani hateka ri koru dagi, pali ri tagege.
A Vure i rata rike ria, na nitora vona i bole mule ria.
Pali ri ngalahere vona, ri pea.
16Ri kavurike a vure ranga.
Ri ratea e BAKOVI DAGI i bage, i tahate ria.
17 ^bRi habi a maka nihabi na taua.
Pali ra maka taua nga i uka ma a vure muholi.
Ri ramai a maka vure karaba
e huriki a gare ne ria hosi uka ma ri lohoka ne ria.
18Ri lohopile vona a Vure i rata rike ria,
i tahoka a nitora lobo.

19“Na tahuna e BAKOVI DAGI i masia a naro hale ne huriki e tuna,
i tahate ria, i ngalahere ne ria.
20Lakea i ta maea, ‘Re huriki nga ri tagege ri longotaro a nitagu.
A maka maregoa ge bele ne ria,
i uka ma ga tuhori ria.
21 ^cRi ramai a maka vure ranga, ra maka maki tavula.
Ra narone ria i madihi a hategu ne ria, a tahate ria.
Ngane ga bolea tara kabu i uka rana i naro tavula, i naro mangamanga,
ga rudu lakea ne huriki a Israel, ge vakamadihi a hatene ria.
22Na tahuna iea a rongova nau ge gutu manga a kanono,
ge gutu parina lobo a maka maki na malala.
A rongova nau ge nunu polotano na malala, na murine huriki ri mate pali,
ge gutu parina a maka kedo i pesi langa ne ria a lolo.

23“Ga rata a maka vuranga legelege ge bele ne ria,
ge manga a bakovi i tahoka a maka maheto i padi e huriki a pile vona.
24Ga rata ria ri gi vitolo,
ri gi giloa na maka gilanga hale, muri ri gi mate.
Ga rudu a maka livoa hateka
turana a maki ri kara ri karaka viliha na malala ge kani ria.
25Na tahuna ri pesi na dala, e huriki a pile bara i rabalaki ria na vabinga.
E huriki ri kapiloho na ruma, bara ri mangenge hateka ri mate.
E huriki a pile bara ri rabalaki lobo e huriki a riau,
a sirula, a koma kiroko, a gare.
26Muga a luhoi ga vakalobo liu ria,
i uka ma ni gi luhoi mule tabu.
27Pali iau bara rata e huriki a pile
bara ri bibi rike ria ri ta maea,
‘Mi ratapile pali e huriki a tara ne BAKOVI DAGI na nitora ne mia.
E BAKOVI DAGI ne ria i uka ma i ratea a maki iea ge bele.’”

28“E huriki a Israel ri uka a niluhoi kamumu,
a niluhoi ne ria i kapo.
29Bara ri tahoka a niluhoi,
ri lohoka vona a maki i vakahale ria.
30I navai a pile i ala taku kunana ge rangi e huriki a Israel ri ala 1,000?
I navai a pile i ala rua kunana ru rangi e huriki ri ala 10,000?
A vuhuna e BAKOVI DAGI a Vure Tuhaka ne ria
i marikoi, i ngalahere ne ria pali.
31E huriki a pile ri lohoka vona a maka vure ne ria i uka nitora.
Pali a Vure ne huriki a Israel i tahoka a nitora i manga a kedo dagi.
32A narone huriki a pile ne huriki a Israel i mavuru hateka,
i manga a narone huriki a Sodoma a Gomora.
Ri manga a kai a vain
i vakabele a maka kanena i nami magaruru.

33“A narone ria i manga a vain ni rata turana a luna mata.
34“E BAKOVI DAGI i tababana ni luhoi
a maka maki e huriki a pile ne Israel ri rata.
35 ^dI davea a parava bara i ratapile ria.
Bara i koli a maka naro hale ne ria i vakamadihi ria.
I uka ma ge tabaka bara ri boru puru ri vurua.”

36 ^e “Na tahuna e BAKOVI DAGI i matai a maka nitora na viri vona i lobo,
pali i ranga ne ria ri tababana,
bara i dodo e huriki ri rata a leho vona,
i korimule ria.
37Muri e BAKOVI DAGI bara i nana e huriki, “Avai a maka vure
ra ri kori mua.
38Ri kani a vina sipsip a bulmakau
ri ninu a nihabi na vain ne mua?
Ri gi pesi rike ri gi tuhori mua
ri gi korimule mua.

39“Pali mu lohoka vona iau kunana, iau a Vure Muholi.
I uka tara vure ge manga iau.
A habi a nimahuri na bakovi.
A bole vuroki a nimahuri na bakovi.
A ratapile a bakovi, a vakamahuri a bakovi.
Iau a ngaru ni ratea tara maki, bara ratea.
40Muholi hateka iau kunana iau a Vure a made vakaroro.
A ratea a nita muholi a ta maea,
41ga pelekado a naro hale ne huriki,
ga halua a bainat nau ge vere hateka.
Ga bolea a bainat iea ga koli ga rabalaki e huriki a pile nau,
ga ratapile e huriki uka ma ri ngaru iau.
42Ga padi e huriki ri ngaru ni vaubi turagu,
a darane ria ge madoko na kiniperi.
E huriki i uka ma ri mate na vabinga,
ria ranga ga rabalaki.”

43 ^fMua o huriki na robo basi, mu vivi turana e huriki a ngate na Vure,
a vuhuna a Vure bara i ratapile e huriki ri rabalaki e huriki a ngate vona,
i koli a naro hale ne huriki a pile.
Pali i ratea a malala ne huriki a tara vona i matapado hateka na matana.
44E Moses, turane Iosua e tune Nun bakovi, ru vakalongo e huriki a Israel vona a nitana linge iea.

45E Moses i vakalongo lobo pali a maka nita ne huriki a Israel, 46lakea i ta tabu i ta maea, “Mu matadoko, mu ramai lobo a maka vinara ngane a habi ne mua. Mu vakalongo e huriki e tune mua, ria ranga ri gi ramai vakaroro a vinara nga. 47Ra ngava nga i uka ma a maki tavula, ria a vuhuna nimahuri ne mua. Mu ramai kamumua, bara mu made tabaka na malala mu gu bolea na tabeke mule lokovonga ne Iordan.”

E Moses i Uka Ma Ge Dili o Kenan

48 ^gNa parava iea kunana e BAKOVI DAGI i takia e Moses i ta maea, 49“O sike na maka lolo ne Abarim na malala ne huriki a Moab. Ra maka lolo nga ri pesi tabukoi na naru e Iordan, a tanga e Ieriko i pesi na tabeke mule lokovonga. O pesi na lolo e Nebo o tuva lokovonga vona a robo e Kenan, ra ngane a ngaru ni habia ne huriki a Israel ge ne vone ria. 50Ioe bara o mate vona a lolo iea, i manga e turamu e Aron i mate na lolo e Hor, muri bara o vano o made turane huriki a viri vomu ri mate. 51Marua muru mate, a vuhuna muru longotaro a nitagu, i uka ma muru togoa a ragu i malamala na matane huriki a Israel na tahuna muru made o Meriba, tabukoi o Kades, na tabeke i ngeki o Sin. 52Ngane bara o tuva lokovonga kunana vona a malala iea. Pali i uka ma go lokovonga, go dili vona ra malala ga habia ne huriki a Israel.”